DCLXXII
Der Knappe Bernd von Plesse in Grundshagen bekennt, für 100 m& Lüb. den Vicaren der Petri Kirche in Lübeck 8m& Rente in seinen beiden Höfen Reppenhagen im Kirchspiel Damshagen und Arpshagen im Kirchspiel Klütz verkauft zu haben. 1436 Jan. 31
Ik Bern von Plesse, hern Berndes sone, knape, to deme Grundeshaghene wonende. Bekenne vnde betughe opembare in dessem breue vor alle den, de ene zeen edder horen lesen, dat ik vor my vnde myne eruen myt vrien wolberadenen mode rechte vnde redeliken vorkoft vnde vppelaten hebbe myt kraft dessen breues den erliken heren, allen vicariesen ghemeynliken in sunte Peters kerken to Lubeke, vor hundert mark lubesch, de ze my an guden guldenen wol ghetellet vnde nogaftighen betald hebbet, de ik vort in myne vnde myner eruen notroftighe nut ghekeret vnde vtegheuen hebbe, achte mark yarliker ewigher rente lubescher pennyghe in vnde vte mynen twen eruen, husen vnde houen, alse dar Krul vppe wonet in deme Repenhaghen des kerspels to Dammeshaghen, vnde dar Hinryk Smylhaghen vppe wonet to deme Erpeshaghen in deme kerspele to Clutze vnde in allen dersuluen erue vnde houe tobehoringhen, alze ze bynnen vnde buten in den veldmarken begrepen sint in eren schedingen vnde enden, beweghelik vnde vmbeweghelik myt allen ackeren, wisschen,weyden, holten vnde wateren vnde myt aller grund, droghe vnde nat, mit allem rechte vnde richte vnde myt aller nut vnde vriheyd, alse myne voruaren vnde ik desuluen twe erue ye vriest ghehad hebben, nichtes butene to beschedende.
Vnde desse vorscreuenen rente scholen vnde willen ik vnde myne eruen vnder vnsen eghenen kosten, arbeyde vnde euenture bynnen der stad Lubeke vruntliken gheuen vnde betalen den vorbenomeden heren vicariis in sunte Peters kerken to Lubeke alle yar in den achte daghen sunte Mertens des werden bisschoppes vnvortoghert vnde vmbeworen. Weret dat en dar togheringhe ane scheghe, so hebbet ze vrie vulle macht, de rente vte den vorscreuenen eruen to pandende vormyddelst weme ze willen, ift en dat bequeme is, vnde der pande vnvoruolghet to brukende na erem willen, sunder allen broke vnde bekummeringhe ofte naschuldighend, vnde der pandinghe vnde aller manynghe, de vmme de rente schut, willen vnde scholen ik vnde myne eruen ze degher schadelos holden. Auer weret dat en yenich hinder edder ghebrek darane scheghe, dat God vorbede, edder ift en nicht bequeme were to pandende, so scholen vnde willen ik vnde myne eruen oft yemand van vnser weghene vns myt den vorbenomeden eruen vnde guderen, eren tobehorighen, rechte vnde vriheyden nenewys beweren to netende ofte to brukende, men de benomeden heren vicarii moghen vnde scholen en denne bruken myt aller vryheyd vnde nut vredesam vnde bequemeliken, alzo langhe went ze ere vorsetenen rente myt allen kosten vnde teringhen, de ze darvmme don, gansliken darvt entfanghen vnde weddernomen hebben, alse en des behuff werd. Vnde ik hebbe ze in de were vnde vredesamen besittinghe dersuluen twe erue vnde erer tobehoringhe, rechtes vnde vriheyd ghevoret vnde ghesat, vnde wise vnde sette ze daryn myt kraft dessen breues, vnde wyl vnde schal myt mynen eruen en desse rente vry holden van aller bede vnde beswaringhe vnde rechte da ane waren vnde beschermen vnde entweren vor aller ansprake vnde bewernisse enes yewelken, vnde wy scholen vnde willen en darane alle dingh keren to deme besten sunder alle argh. Wanner ok dat land to Mekelenborgh mundighe erfherren heft, so scholen vnde willen ik vnde myne eruen myt vnsen medeloueren den vorbenomeden vicariis vnder vnsen eghenen kosten desses kopes vnde breues bestedeginghe schicken myt myner gnedighen heren ingbeseghelen in den ersten twen manten, alse ze vns darto esschen, vnvorsumet vnde vngeweyghert. Jodoch hebbet ze my vnde mynen eruen ghegund, dat wy desse vorscreuenen rente alle yar in den achte daghen sunte Mertens vor hundert mark lubesch wedderkopen moghen, densuluen heren vicariis de houetsummen myt der plichtighen rente vnde myt allen schulden tosamende to betalende bynnen der stadt Lubeke myt gudem grouen pagemente, alse dar denne genghe vnde gheue is, de kleynen pennynghe butene bescheden. Wy sint ok pflichtich, en den wedderkop in den achte daghen to Pinxsten touoren witliken to uorkundigende vnde en denne vp de vorkundigheden tyd nogaftighe entrichtinge to donde van allen dinghen sunder eren schaden. Alle desse vorscreuenen stucke loue ik Bern van Plesse vorbenomet vor my vnde myne eruen myt vnsen truwen medeloueren, alze wy Helmold van Plesse, dessuluen Berndes broder, Egghard Quitzowe wonaftich to deme Vogedeshaghene in deme kerspele to Dartzowe, Johan Quitzowe to Gutowe wonende in deme kerspele Dammeshaghen vnde Detleff van Bokwolde to Johanstorpe in deme kerspele to Dartzowe, knapen, louen vnde segghen vor vns vnde vnse eruen myt deme suluen Bernde van Plesse vnde myt synen (eruen) vngbescheden myt samender hand vnde islik vor vns alle den vakenomeden vicariis in sunte Peters kerken to Lubeke vnde den ghennen, de dessen breff hebben myt eren willen, ze zyn gheystlik edder werlik, in guden truwen myt gantzeme louen stede vnde vast to holdende in aller wise, alse vorscreuen is, vnde nenerleye ynsaghe ofte arghenlist vnde ok nenner were ofte behelpinghe daryeghen to netende oft to brukende, darmede desse kop vnde warighe ofte desse breff mochten krenket edder broken werden na gheystlikes ofte werlikes rechtes esschinghe. Des to groterer bekantnysse vnde bewaringhe ik Bern van Plesse, houedman, vnde wy medelouere alle vorbenomend hebbet vor vns vnde vnse eruen vnse ingheseghele myt endrachtighen guden willen henghet an dessen breff. Gheuen na der bord Cristi verteynhundert yar unde darna in deme sossevndedruttigesten yare, des neghesten dinghesdages vor vnser Vrowen feste to Lichtmissen.
Nach dem Original. Mit den fünf anhangenden Siegeln. Bern von Plesse: Siegel rund, 2 7/10 Ctm. Auf stehendem Schilde ein nachrechts schreitender Stier. Umschrift: x sigillv berendes x van x plessen Helmold von Plesse:
Siegel schildförmig, 2 9/10 Ctm. hoch. Auf der Schildfläche steht der nach rechts schreitende Stier. Umschrift : + S HELMOLDI - DE . PLESSE Eccard Quitzow: Siegel rund , 2 1/2 Ctm. Auf schrägrechts durch eine schmale Binde getheiltem Schilde steht beiderseits ein 6strahliger Stern. Umschrift soweit erhalten : ...m x ecghert x quitsow Johann Quitzow: Siegel rund, 2 3/10 Ctm. Schild wie bei dem Vorigen. Umschrift : s´ iohan x : x quitzow..... Detlef von Buchwald : Siegel rund, 23/10 Ctm. Auf stehendem Schild ein nach rechts gewandter gekrönter Bärenkopf mit aufgesperrtem Rachen und deutlicher Zunge. Umschrift : S `DETELEWS . VA . Bocwolde
